幫件死物買保養就係抵，叫你買個保障就係呃人

相信大家買野時，都會問下有無保養，仲希望越長越好。尤其買部電話都過萬蚊嘅時候，都唔爭在加多千幾二千蚊去買個保養，萬一跌爆mon都有得賠。其實有時都唔明白，你用都未用就已經諗會跌爆mon，你又知你一定跌爆？

好啦，你會幫件死物買保養，你又有無諗過買個保障比自己？幫件死物買保養就係抵買，人地叫你買個保障就係呃人，呃你錢。我明白，可能保險業風氣有時好令人反感，但係無可否認有d保險你有勝於無。

小編係個90後，返學時做兼職有錢第一份買既係純醫療保險。唔係因為有人sell或者支持朋友，而係我覺得每個月比200幾蚊就可以有一個醫療保障，入醫院都唔洗驚。雖然香港公立醫院水平其實係世界級，但係都要明白每日求診嘅市民多不勝數，比我更有需要大有人在。小編亦試過陪朋友排急症，痛到不得了都足足等左9個鐘頭先可以上房，所以我亦唔希望自己有事時要係急症室到捱，等到有人理或者有床位。

好多人會話「咁後生買咩保險，用唔著咪嘥錢？」早排有睇新聞都知道有位藝人本身以前係游水港隊，但踢踢下波時就心臟有事暈低，仲要入ICU。雖然咁大件事當然係去公院啦，只係想話你知，一個常做運動，身體應該比一般人健康既運動健將都會有咁既情況，大家仲可以覺得「後生=健康=無機會入醫院」？更何況用唔著即係代表你無事，咪當做善事捐比有需要既人；而不幸有病時，亦都唔洗龐大醫療費擔心。

係呢個日日都飲杯30幾40蚊「虎紋手工珍珠芋圓黑糖鮮奶茶加激厚芝士奶蓋」既年代，點解都唔肯比一餐飯錢去保障自己既健康同埋荷包？到時有病又無錢去私院，唯有無了期地排期，繼續辛苦。

保險都係理財一部分，每個人都有唔同需要，但醫療保險總係有好過無。你唔買係你嘅事，但唔可以話係呃人！