寵物保險條款要注意

近期好多讀者都向我查詢寵物保險意見，最常就係2間公司計劃掙扎，分別就係已經出咗10幾年嘅「藍__字」及新推出嘅「P____e Care」。保障內容上各有優劣，確實令人難以取捨。買保險，最緊要睇條款，所以小編亦為大家比較咗兩個計劃條款。相信各位主人最擔心都係毛孩有病時，醫療開支能唔能夠索償。所以呢次小分析，係會就住醫療索償部分的不保事項來講。

就各單張或網站上寫的「主要不保事項」，其實十分相近。不過「P____e Care」列明 「任何因故意、疏忽或可預防的行為所引致之疾病或受傷」為不保事項。雖然有大多數疾病可以透過日常護理或接種疫苗去預防，但其實並非100%可以避免。如果「疏忽所引致之疾病或受傷」為不保事項，但何謂「疏忽」？相信香港唔少主人都要返工，只好獨留毛孩係家中。若果毛孩百厭，咬爛啲抱枕吞棉花、入廚房吞膠袋而要做手術，又或者跳高跳低跳斷腳，又算唔算「疏忽所引致之疾病或受傷」？對比起「藍__字」，「P____e Care」的「主要不保事項」好似對保險公司較有利。

而係「保單條款」中，關於醫療部分嘅不保事項整體上兩間亦十分相近。但「P____e Care」中提及的幾點十分需要注意！「與髖關節發育不良或任何相關脫位或半脫位有關的骨骼或關節病症; 肘發育不良; 髕骨脫位或半脫位; 剝脫性骨軟骨炎或與股骨頭無菌性壞死相關的任何骨折、脫位或半脫位」，髖關節即大約指大腿與盆骨所連接位置，而髕骨即指膝頭骨。毛孩成日都跳來跳去，一啲以上提及嘅關節難免會受傷，尤其有啲毛孩品種普遍較脆弱，若果不保，主人亦要額外承擔醫療開支。

「P____e Care」又列明「透過疫苗接種可預防的疾病」及「受保寵物眼睛或耳朵的年齡相關變化」為不保事項。事實上並非所有疾病都可以透過疫苗100％預防，難免亦有機會患病。另外，毛孩同人一樣，年紀大咗就會多咗病痛，例如白內障好多時係年老發生。以上兩種情況都唔包，對主人保障好似唔太足夠。

保額上，「P____e Care」比「藍__字」多，確實能夠保障主人財務上較多。但比較埋保險條款，似乎「藍__字」嘅條款較簡單直接，而「P____e Care」則較多不保事頂，對主人唔太有利。各位主人要好好考慮各種因素再決定買邊間，唔好淨係睇保障表呀！

P.S. 以上資料只供參考，詳請請參閱各保險計劃條款及細則。本專頁一切言論並不構成任何要約，招攬，邀請，誘使或任何建議及推薦。讀者請獨立思考及自行作出決定，如因相關言論或文章招致任何損失，一概與本專頁無關。